আঞ্চলিক ভাষায় কবিতা

চলনা বেরাইতো যাই আঁর ফোঁয়ারে আজিয়া

শিমুল বড়ুয়া উনন

চলনা বেরাইতো যাই আঁর ফোঁয়ারে আজিয়া

তোঁয়ার আঁতত আঁত রাখি আঁইট্টম আইজ্জা রাতিয়া।

হস্সবাজার বালুর চরত, ছাতির তলে বই

দইজ্জার ঢেউ চাইওম আঁরা হতা হই হই।

 

মনে হইলে যাই পারিবা রেজুর হালর মুখত

নৌকাত চড়ি হাল পারাইম ধরির তোয়ার আঁতত।

গম নলাইলে, মেরিন ড্রাইভত ঘুইজ্জম আঁডি আঁডি,

বিয়াল অইলে সিএনজি লই যাইওম আঁরা বাড়ি।

 

তুঁই চাইলে যাইওম আঁরা সেন্টমার্টিনত

গাঙচিলরে আধার দিওম ভাসাই বাতাসত।

জাহাজর ছাদত ওড়ি বইস্মম মুখামুখি,

পিছদি যাই বেরাই ধইজ্জম টাইটানিকর নায়কর নান গরি।

 

জোমপইজ্জা রাতিয়া দ্বিয়ার চরত যাই

দুনজনে বই থাইক্কম হন হারন নাই।

তোয়ার চোখত ঘুম আইলে আদর গরি হই

আঁর কোলত মাথা রাখি ঘুম যাইও গৈ।

 

তুই চাইলে যাইত পারি পুগর পা-রত (পাহারত)

গাড়ি নাইদে পেট পুরেদ্দে পারিবানি আঁড়িত?

চাওম্মার গরর হানা পিনা হাই পারিবানি?

তুই চাইলে দিওম আনি ঝর্ণা মুখর পানি।

 

আগা গোড়া দুনিয়া আইল আইল মিক্কা লায়

পা-রর মাথাত পানি ঝরে চল না যাই চাই।

পা-রর নিচে পা-রি হাল যারগৈ বেহা-চুরা

মুরার ভিতর ডাক মারেদে শিয়ারি কুরা।

মইষহালি, কুতুবদিয়া আরো সোনাদিয়া

তুঁই চাইলে যাইম আঁরা, নজানিবো কিয়া।

রামুত আছে সুন্দর সুন্দর বরগুয়া অলর কিয়াং

বাঁকখালির মিডা পানিত গরিত পারো শিয়ান

এতো কিছু হইবার পরও নক্যা মাতর তুঁই

ওড়না ঠানি পুছর দেকির চোখর পানি তুই।

যাই পারিলে গম লাগিত, খুশি অইতাম আঁই

মনে হইলে হইও আঁরে বই থাইক্কম তোয়াল্যায়।